Lingva Festivalo
de Odessa, Ukrainio I
(de Tatjana Auderskaja, 2001)
LINGVA FESTIVALO EN ODESSA
La 24-25-an de novembro, 2001 en Odessa (Ukrainio) okazis Lingva Festivalo, dedicxita al la jaro de Lingvoj – 2001.
Gxi estas jam dua en Ukrainio LF (la unua okazis en marto cxi-jare en Berdjansko). Nia klubanino Olga Gribovan partoprenis TEJO-KER Seminarion en Budapesxto, dum kiu oni instruis, kiel prepari Lingvajn Festivalojn, kaj uzante la ricevitajn sciojn, nia junulara E-klubo „Verdajxo“ organizis LF en nia urbo.
Tiu festivalo, versxajne, estas unika, cxar gxi okazis absolute sen kontribuo de ajnaj instancoj. Nek mone, nek per „telefonpetoj al subuloj“ helpis oficialuloj; naci-kulturaj societoj, krom kelkaj esceptoj, interkonsile decidis ne subteni nin kaj ne partopreni la Festivalon, kiun organizas „iu neauxtoritata por ili instanco“.
Nur 2 firmaoj donis al ni iujn kancelariajxojn por plej modestaj premioj por prezentantoj de lingvoj kaj gajnintoj de konkurso de poliglotoj. Sume tio konsistigis 160 gr, aux malpli ol 30 euxroj.
Sed la Festivalo ja okazis!
La tago 24-a de novembro estis la sola pluva tago en tiu monato; tamen la urba lernejo numero 52 estis plensxtopita de homoj. Al prezentado de 19 lingvoj venis cx. 200 infanoj el kelkaj urbaj lernejoj, studentoj de Pedagogia Universitato kaj simple interesantoj pri lingvoj, lingvemuloj.
Estis prezentitaj la lingvoj:
Araba, armena, cigana, cxehxa, Esperanto, franca, gagauza, germana, greka, hebrea, hindi, hispana, itala, japana, jida, persa, rumana, rusa, ukraina.
Post laboro, la lernejo organizis por cxiuj prezentantoj Rondan Tablon kun abundaj ukrainiaj naciaj mangxajxoj; ankaux estis prezentitaj dum LF arabaj kaj hindiaj naciaj mangxajxoj far studentoj de Medicina Universitato.
Malgraux cxiuj niaj zorgoj kaj senesperoj, la Festivalo igxis vera festo por lernantoj – bunta, vigla kaj gaja. La lernejo estis bele ornamita per floroj, multkoloraj banderoloj kun la nomo „Lingva Cxielarko“ kaj maksimoj pri lingvoj kaj amikeco inter popoloj. Sonis diversnacia muziko dum prezentadoj en la klasoj kaj dum interrompoj en la halo; ankaux en la halo staris videomagnetofono, kie oni povis vidi registrajxojn de diversaj naciaj festoj.
Konkurso de poliglotoj fakte komencigxis dum la unua tago, kiam lernantoj kuris de unu prezentado al alia, penante skribi en pli multaj lingvoj la faman frazon de A. S. Pusxkin: “ Do, mi logxis tiam en Odessa...“ (la lastan frazon de romano „Evgenij Onegin“).
Dua parto de la konkurso okazis la 25-an de novembro, kiam 3 teamoj de poliglotoj solvadis taskojn similajn al nia fama kvizoludo „Kio? Kie? Kiam?“.
Kaj finis la Festivalon Internacia Koncerto, kiun partoprenis artaj kolektivoj de Junulara Kultura Centro, kiu helpis al ni fari la tutan organizan laboron, de kelkaj urbaj lernejoj, de Greka Kultura Asocio, kaj ankaux studentoj de Medicina Universitato el Arabaj Emirejoj, Tunizio, Hindio, Palestino, Sirio, Gvineo, Nepalo, Sudano.
Nur ni scias pri niaj zorgoj kaj „nevideblaj al mondo larmoj“. Sed sxajnas, ke por publiko la Festivalo igxis vera festo de lingvoj, festo de amikeco.
Tatjana Auderskaja,
gvidantino de junulara Esperanto-klubo „Verdajxo“